काठमाडौं — नेपाल दूरसञ्चार प्राधिकरणले उच्च गतिको ब्रोडब्यान्ड इन्टरनेट सेवा नपुगेका गाउँपालिका र नगरपालिकाका वडाहरूमा सेवा विस्तार गर्ने तयारी थालेको छ। यसका लागि एक सूचना जारी गर्दै ती वडाहरूको विवरण सङ्कलन प्रक्रिया सुरु गरिएको जनाइएको छ।
प्राधिकरणका अनुसार गाउँपालिका तथा नगरपालिकाको कार्यालयदेखि वडा कार्यालयसम्म अप्टिकल फाइबर, वायरलेस र भीस्याट प्रविधिमार्फत ब्रोडब्यान्ड सेवा विस्तार गरिनेछ। सो कार्यक्रमका लागि ग्रामीण दूरसञ्चार विकास कोष प्रयोग गरिने प्राधिकरणले स्पष्ट पारेको छ।
यसअघि सञ्चालनमा आएका परियोजनाबाट छुटेका वा दुई वर्षे निःशुल्क सेवापछि इन्टरनेट नपाएका वडाहरूको पहिचान गरी सेवा विस्तारको प्रक्रिया अघि बढाइनेछ। त्यसपछि सेवा प्रदायक कम्पनी छनोट गर्ने प्रक्रिया प्रारम्भ गरिनेछ।
डिजिटल रूपान्तरणलाई प्रवर्द्धन गर्न र सूचना प्रविधिको पहुँच विस्तार गर्न प्राधिकरणले यो परियोजना अघि सारेको हो।
