काठमाडौँ— Windows 11 सार्वजनिक भएको धेरै समय भइसके पनि विश्वभर करिब १ अर्ब पीसी अहिले पनि Windows 10 मै चलिरहेको तथ्य सार्वजनिक भएको छ।
Dell का उच्च अधिकारीहरूले दिएको पछिल्लो विवरणले Microsoft को नयाँ OS प्रति प्रयोगकर्ताको आकर्षण अपेक्षा अनुसार नबढेको संकेत गर्छ।
पीसी Windows 11 चलाउन सक्ने भए पनि अपग्रेड नगर्ने ठूलो संख्या
Dell का Chief Operating Officer Jeffrey Clarke का अनुसार, विश्वका करिब ५० करोड पीसी Windows 11 चलाउन सक्षम भए पनि अपग्रेड नगरेको समूहमा पर्छन्।
अरू करिब ५० करोड यस्ता पुराना पीसी छन्, जसले Windows 11 को हार्डवेयर आवश्यकता नै पूरा गर्न सक्दैनन्।
कम्पनीले यस्तो अवस्थालाई “नयाँ पीसी र OS अपडेट दुवैका लागि ठूलो बजार” का रूपमा व्याख्या गरेको छ।
ढिला भइरहेको छ Windows 11 को ?
Windows 10 को संचालन आधिकारिक समाप्त भइसके पनि Microsoft ले सीमित सुरक्षा अपडेट उपलब्ध गराइरहेकाले धेरैले तत्काल अपग्रेड नगर्ने निर्णय लिएका छन्।
पुराना PC ले Windows 11 को कडा हार्डवेयर मापदण्ड पूरा गर्न नसक्नु अर्को ठूलो कारण हो।
साथै, प्रयोगकर्तामध्ये धेरैलाई Windows 11 को इन्टरफेस र परिवर्तनहरू अपनाउन हतार नभएको विश्लेषकहरू बताउँछन्।
गेमिङ समुदायमा पनि Windows 10 नै बढी प्रचलित
गेमिङ प्लेटफर्म Steam को पछिल्लो तथ्यांकमा पनि करिब एक तिहाइ प्रयोगकर्ता अझै Windows 10 मा देखिएका छन्।
यसले गेमिङ समुदायमा समेत Windows 11 को अपनत्व अपेक्षा भन्दा कम भएको पुष्टि गर्छ।
कम्प्युटर बजारमा देखिएको प्रभाव
Windows 10 मा यति ठूलो संख्या टिकिरहनुले कम्प्युटर बजारमा सीधा असर पारेको विश्लेषकहरूको भनाइ छ। Windows 11 को अपनत्व अपेक्षितरूपमा अघि नबढ्दा नयाँ OS को विस्तार गति स्वतः सुस्त छ। अर्कातर्फ, पुराना पीसीले Windows 11 का आवश्यक हार्डवेयर मापदण्ड पूरा गर्न नसक्ने भएकाले आगामी वर्षहरूमा नयाँ कम्प्युटर किन्नुपर्ने माग क्रमशः बढ्ने अनुमान गरिएको छ।
Dell लगायतका पीसी निर्माताले यस्तो अवस्थालाई सकारात्मक अवसरका रूपमा व्याख्या गरेका छन्। तर प्रयोगकर्ताको बजेट, रोजाइ र पुरानो प्रणालीमै काम चल्ने धारणा हेर्दा Windows 10 बाट पूर्ण रूपमा संक्रमण हुन अझै समय लाग्ने विश्लेषकहरूको मूल्यांकन छ।
