काठमाडौं — स्पेनको पब्लिक युनिभर्सिटी अफ नवारा (UPNA) का इन्जिनियरहरूको टोलीले पहिलोपटक यस्तो होलोग्राम निर्माण गर्न सफल भएका छन्, जसलाई प्रयोगकर्ताले हातले छुन सक्नेछन् र अन्तरक्रिया गर्न सक्नेछन्।
अनुसन्धानका प्रमुख लेखक बौजबिबका अनुसार, “हामीले फिल्महरूमा देख्ने र होलोग्राम भनी बुझ्ने दृश्यहरू वास्तवमा ‘भोल्युमेट्रिक डिस्प्ले’ हुन् — जुन वायुमण्डलमा तैरिरहेको जस्तो देखिन्छ र विभिन्न कोणबाट हेर्न सकिन्छ, बिना कुनै VR चश्मा।”
यो नयाँ होलोग्रामले कसरी काम गर्दछ?
यो प्रविधि InteVol Project अन्तर्गत विकसित गरिएको हो, जुन युरोपेली अनुसन्धान परिषद (ERC) को आर्थिक सहयोगमा UPNA द्वारा नेतृत्व गरिएको छ।
यसअघि भोल्युमेट्रिक डिस्प्लेहरूको अवधारणा धेरैजसो 3D प्रोजेक्टरहरूजस्तै रहे पनि, नयाँ प्रविधिले त्यसलाई अन्तरक्रियात्मक बनाएको छ। साधारणतया, यस्तो डिस्प्लेमा ‘डिफ्यूसर’ भनिने उपकरणमा एक सेकेन्डमा हजारौँ तस्बिरहरू देखाइन्छन्, जसले मानव आँखाले छुट्याउन नसक्ने गतिमा माथि-तल हल्लिँदै तस्बिरहरू बनाउँछ। यसपटक, प्रयोग गरिएको डिफ्यूसरले प्रति सेकेन्ड २८८० तस्बिर देखाउँछ।
तर फरक के हो भने, यसपटक प्रयोग गरिएको डिफ्यूसर परम्परागतजस्तै कठोर र भङ्गुर नभई, लचिलो र मानव स्पर्श सहन सक्ने ब्यान्डहरूबाट बनेको छ। अनुसन्धानकर्ताहरूका अनुसार, प्रयोगकर्ताले अब होलोग्राममा हात हालेर भर्चुअल वस्तुहरू समात्न सक्नेछन्।
वास्तविक उपयोगको सम्भावना
यो प्रविधिको सबैभन्दा ठूलो फाइदा के हो भने, यसलाई प्रयोग गर्न प्रयोगकर्ताले कुनै भारी VR हेडसेट लगाउनु पर्दैन। साथै, यो होलोग्राममा एकभन्दा बढी व्यक्तिले एकैपटक अन्तरक्रिया गर्न सक्नेछन्।
यस प्रविधिको प्रयोग विविध क्षेत्रमा गर्न सकिन्छ — जस्तै इञ्जिनको पार्टहरू भर्चुअल रूपमा देखेर त्यसको संरचना बुझ्न, वा संग्रहालयमा अझ बढी अनुभवात्मक अवलोकन प्रदान गर्न। यो प्रविधिले शिक्षा, चिकित्सा र मनोरञ्जन क्षेत्रहरूमा नयाँ ढोका खोल्न सक्दछ ।
